May 2, 2016, 11:00 pm

أنحني  و أبوس   خدّك  و اعترف

يا  احنيّن   يا  هيف   يا  كلك   ترف

أنت   مو طبعك  بالعشك   طبع   هاوي

أدري   بيك  صيّاد  ماكر  محترف

*****

أبمشيتك   و  الطول  شطب   ريحان

                                  يا   الحملين  البصدرك

                                     و ألف  حمل  رمّان

                               يا  ريت   أشيلك   أو  بيك  انهزم

من   بين   لمّة   زلم

ريت   الحمولة   الشالتك

جان   جابت    سطعش  من   مثل   مثلك

واكليبي    هالمفطوم

محموم  أو  برد  الصبح   كرصات

أو   محروم  من   ملحك

و  فوك  الملح   حسرات

محروم   من  زاد  البتنورك

و  شوية  تمر

يا   ريت  من   تمّر   عالبيت

تترك   لي  أثر

أرضى لو   عطّاب  نارك

لو  رنّة   خلاخل

عهد   أنطيك   أقبل   و  أنتظر

كلّي   منهو   اليطلع   بالفجر

أشهب كبل

وجهك  ؟؟!!   لو   عشّين   البصدرك  ؟؟!

لو   نصّين  لوز   الشفايف  ؟؟!

أهلال   أو   بدر

*****

أنا   مجبور  على   كل   نزوات   طبعك

و بالليل   أشكو   بلوتي   الربّي

و  انادي   ما  حيلتي ..؟؟!

ما   بيّ   بعد   حيل ..!!

و   الهيل   منثور  ما  بين

كهوة   و  أدلال   و  طلّتك

و انجوم   السما

و  فوك   العمى

أنت   أحكمتني   حكم   تأبيد

و من  دعج   زوج   أعيون

صار   الحكم   تشديد

يا   بو  زندين   مرمر

يا  قدّاح  و  اكثر

شارد   مثل   ظبي   البيد

و  أكلادة   ذهب   بالجيد

أتوّج   عالصوبين

و  ابشهرين

شعبان   أو   رمضان

وانا   بالعيد   فوك  ما  مديون

مجنون  أو  حافي

و  عالباب  أنتظر   جيتك

حتى    لو ناوي  أتحج   لو   تعتمر  خبّرني

هم   أصطبر

الله  خلقني    و هاي   من    طبعي

ما   أقبل   أبد   حجّة  عذر

لو  كلت ... لا ... لا ...أموت ...

و  هم   أنتحر

وما   أرضى    تجيني    بالخاصرة

طعنة    غدر

يا  ترف  يا    صيّاد

يا   أكبر   نجر ...

          * * * * * *